正是
粵人言談富感情，
皆因助詞如繁星。
婉約仿似鶯歌鳴，
疾如洪鐘鎭雷聲。
粵語之所以好聽，除咗聲調多之外，仲多得豐富旣助語詞。助語詞爲粵語旣交流增添唔少感情。如何判斷係唔係助語詞呢？如果一句話中，刪咗某個詞，而個句子依然完整，就有可能係助語詞嘞。若果無咗呢啲助語詞，我地仲點可以表達到感情呢？
廣東旣經濟引領左成個中國，如果無咗廣東人，中國旣經濟或者會倒退幾十年，但廣東人卻對自己旣語言咁睇唔起，可以話係不可理喻旣。齋睇粵語旣助語詞之多，就足見廣東人豐富旣感情。
本文有啲長，還請耐心細看，皆因粵語助語詞實在太多喇，筆者都蒐集咗幾個月，動筆都用咗兩個月，但仍覺得相當倉猝，但都係忍唔住要發喇，可能會有紕漏，還請指正。以下開始。
啊：
有三種作用：
其一，讀aa3，尾助詞，用於陳述句或祈使句後，表感歎効果並加強語氣。如：「我好罣（gwaa3心掛）住你啊！」「佢走咗啊！」「好叻啊！」「咪住先啊！」
其二，讀aa3，用於疑問句後，使語氣婉約，使被問者聽落更舒服。如：「做乜野啊？」聽落就舒服過「做乜野？」
其三，讀aa4，用作反問句。如：「係你啊？咁啱嘅？」
其實「啊」同古文對應旣就係「也」。
阿：
讀aa3，稱謂助詞。廣東人一般用於對人之稱呼前。如：「阿叔」，「阿伯」，「阿強」。
呀：
「呀」輕聲過「啊」，一般可以用起句子中間，都係有三種表達：
其一，讀aa3，用於句子中，使語氣婉約。如香港某集電臺節目講「廣東人學英語」，其中有句話：「就係識講咋喎，但係又唔使記得佢啲文字呀同字母箇喎。」
其二，讀aa3，表示一直做住某事，或一直保持某種狀態。如：「一直做呀做」，還有羅文首歌『作大』旣歌詞「爽呀爽呀爽，High呀High呀High」。
其三，讀aa3或aa6，相當於「就」旣意思，如：許冠傑旣歌『佛跳牆』歌詞「計起呀完全就唔係貴唄（beh3），翅肚呀能潤肺唄。」
嗟：
讀ze1，尾助詞。有「僅此而已」之意。如：「好簡單嗟」，「輕輕滾一下嗟，就已經好香」。
亦都可以表達「不僅如此」之意。如：「唔止佢識做嗟」，「唔止你，我聽日都要返工嗟」。
又用於問句後故作媚態。如：「係唔係嗟？」
嘅嗟：
用於問句後故作媚態。如：「係唔係嘅嗟？」
此外又可以用於旣符合「嘅」，又符合「嗟」之情況。如：「好簡單旣嗟」，「唔止佢先識旣嗟」。
咋：
讀zaa3，尾助詞。都有「僅此而已」之意，但情緒帶點不滿，或者唔耐煩。如：「好簡單咋」，「我祇不過係想噉樣咋」，「就係噉咋」，「我都一樣要返工咋」
之嘛/咋嘛：
尾助詞，表示語氣轉折，有限制或讓步旣作用。通常會跟起「不過」之後，有「僅此而已」之意，相當於「而已」。通常同「淨係」、「之不過」或「祇不過」等連詞連用，如：「淨係得一個之嘛」，「我之不過想試下之嘛」，「聲調唔同之嘛」。
嘅/忌/其：
讀ge3，尾助詞。一般係描述人或事物其屬性，用起形容詞或代詞後；亦會用於動詞後，將動詞轉爲形容詞，描述人或事物其狀態。如：「好勁嘅」，「係噉樣嘅」，「知嘅」。筆者鍾意用「旣」。
「嘅」係俗字，尾助詞「忌」係本字，用於句尾，而句中旣本字係「其」；亦有人話「之」字古音就讀ge3。
古文對應旣助語詞係「也」「忌」、「其」、「者」。
詩經就已使用尾助詞「忌」，如『詩經‧國風‧鄭風‧大叔于田』：叔善射忌，又良御忌，抑磬控忌，抑縱送忌。（叔：鄭莊公之弟共叔段；抑：jik1抑或，亦；磬控：騁馬曰磬，止馬曰控；縱送：射箭曰縱，逐禽曰送。）朱熹集傳述：「忌、抑，皆語助詞」，但「抑」嚴格來講唔屬於助語詞，應歸爲連語，表「抑或，亦」之意。
再如『康熙字典』記錄對「其」字之解釋：
其，助語辭。『詩經‧周南』灼灼其華。『玉篇』辭也。
又音姬。『韻會』語辭。『尚書‧微子』若之何其。『詩經‧小雅』夜如何其。
又音寄。『韻會』語已辭。『詩經‧檜風』彼其之子。
又『韻會』或作忌。『詩經‧鄭風』叔善射忌。
架：
尾助詞，其實係相當於「嘅啊」旣連讀。一般用於形容詞或代詞後；亦會用於動詞後，將動詞轉爲形容詞。作用：
其一，讀gaa3，用於陳述句，增強語氣。如：「佢好勁架」，「佢應該係噉樣架」，「佢知架」，「唔係噉樣架」。
古文對應旣助語詞係「也」。
其二，讀gaa3，用於疑問句，增強疑惑感。如：「係唔係真架？」「係唔係佢架？」「係唔係去打波架？」
其三，讀gaa4，表反問，增強反問語氣。如：「佢好勁架？」「眞係（噉樣）架？」「佢真係知道架？」
架咋：
用於符合「架」旣清況，同「咋」差唔多，語氣有所加強。如：「我淨係想噉樣架咋」。
添：
讀tim1，尾助詞。使語氣委婉：表示一個結果本來唔會發生，或唔應該發生，卒之發生咗，表達懊悔之情；或者表明實際情況同自己所想有出入。如：「劇情太吸引，以致誤時晏瞓添。」「瞓過矣（eh3）隆添。」「仲以爲佢好勁添。」
或者加強對件事覺得好荒謬旣語氣。如：甲講：「中國有啲餐廳已經有機械人侍應，美國都無。」乙覆：「聽講中國台山遲下重有個世界最先進旣核電站添。」
埋：
讀maai4，助語詞。用於動詞後，表示一件事還未做完，要做完先至做令一件事。如：「等我做埋啲野先」。
亦有表示做一件事旣同時，附帶或者兼且做多件事之意。如：「（兼且）報埋啲附加費用啦」，「講埋晒呢啲野」。
註：「添」同「埋」係普通話表達唔出呢種感情。
緊：
讀gan2，助語詞。用於動詞後，表示正起度做一件事之中，相當於英文之-ing。如：「我做緊野，未得閒住」。
住：
讀zyu6，助語詞。用於動詞後，表示另一件事未可以做，姑且做目前件事先；或者係保持緊一種狀態。如：「我做緊野，未得閒住」，「玩住呢個遊戲先」；「我好罣住你」，「塊石上寫住一句話」。
有人認爲個「住」正字係「著」，其實「住」本身就係正字。睇睇蘇東波點寫：蘇軾『乞賜度牒修廨（haai6）宇（官署）狀』使宅樓廡（mou5，堂下周屋），欹（kei1，不正）仄（zak1，同「側」）罅（laa3，隙）縫，但用小木橫斜撐住。
親：
讀can1，助語詞。用於動詞後，有兩種用法。
其一，顧名思義，用個「親」字，梗係表示自己關心旣人或物受到傷害或唔好旣遭遇。如：「唔好砸親人」，「小心整親佢啊」。
其二，表示逢係如此之意。如：「佢切親野都會切到手旣」，「話你幾多次，你做親野都有手尾跟」。
晒/澌：
讀saai3，助語詞。用於動詞後，表盡或完全。如：「做晒啲作業」，「你玩晒啦」，「（完全）扮晒野」。
再如：「做埋晒啲噉旣野」，將「埋」同「晒」結合埋一齊用，上文已經講過「埋」係表示做一件事旣同時兼且做埋其他事，用於此就係話人「做啲該做旣野，同時又做埋啲唔該做旣野」，加埋個「晒」字，語氣就再加強喇，話人完完全全係鍾意做啲噉樣事旣人。
「晒」係俗字，佢本字其實係「澌」，本讀si1，語轉爲saai3，盡也。
新會北部某啲地方，還會用個「清」字，讀ting23，表盡之意，與「澌」用法相同，如：「做清啲作業」。
未：
讀mei6，助語詞。
用於動詞前，表示件事而家無發生，以後可能會發生，沿用自古語。如：「尚未做晒啲野」。再如：東漢王符『潛夫論・德化』和德氣於未生之前。
用於疑問句尾，表示問對方係未完全做晒啲野，或者係未處於某一種狀態。如：「做晒啲野未？」「問你驚未？」再如：『史記 ・魏其武安侯列傳』（皇）上乃曰：「君除吏已盡未？吾亦欲除吏。」（意思係：君要任命旣官已盡未？我亦想任命幾個。）
咗：
讀zo2，語已詞，用於動詞後，表示完成。佢同「晒」有啲相似，唔同旣係「咗」表示完成之後旣狀態，「晒」表示盡，焦點係放於所做旣成個事物上。如：「個任務完成咗喇」。
古文對應旣助語詞係「矣」。
『康熙字典』載「只」係一個語已詞，唔知「咗」旣本字會唔會係「只」呢？不過尚欠攷正。
矣：
讀音爲eh3或eh1。用於動詞後，意同「咗」。如：「個任務完成矣喇」。
此助語詞新會話常用，以代替「咗」。
誒：
讀e6音拉長，助語詞。用於答問題時旣思攷或回憶。
欸：
助語詞。
其一：讀eh3，尾助詞，無實意，或用於句與句之間作停頓，或用於結尾以豐富韻調。
如林海峯旣攺篇歌詞：「佢叫雞珍，去咗世衛，應該會喫澌啲雞欸。」
又如香港某集電臺節目講「廣東人學英語」，其中有句話：「所以你請個泰傭欸，返來呢，無幾耐呢，一個禮拜佢就可以講你啲話旣喇」。
其二：讀ei6，有人呼自己時，表示應人。
噃/啵：
讀bo3，尾助詞。兩種用法：（使語氣委婉）
其一：有種恍然大悟旣意味，或表達一種意想不到之感歎或讚歎。如：「係噃」，「好犀利噃」，「支筆好好寫噃」。
其二：表達對方旣惗法有錯，自己無對方所惗旣意圖。表示轉折？如周星馳電影『賭俠』裡有句臺詞「阿叔，我無話過養你噃！」再如：「唔使擔心，我實會養你噃。」
其三：禁止對方做某啲事。如：「你唔好打佢噃」。而加個「喇」組成「喇噃」，就變成要求對方做某啲事或唔好做某啲事。如：「好快做啲做作業喇噃」，「唔好再玩喇噃」。
喎：
尾助詞。三種用法：
其一：讀wo3，同「噃」，但「噃」係合口聲母b，「喎」係開口聲母w，所以「喎」語氣更強。
改其例：「係喎」，「好犀利喎」，「支筆好好寫喎」，「我無話過養你喎！」「唔使擔心，我實會養你喎！」「你唔好打佢喎！」「好快做啲做作業喇喎！」「唔好再玩喇喎！」
其二：讀wo5，陳述人地所講旣野，表明唔代表自己觀點；或者實際情況同自己所想旣相反，加強埋怨之語氣。如：「佢話佢可以完成個任務喎」，「係啦喎」。
其三：讀wo4，表達啲野竟然意想不到。如下文會有一句：「鬼搵替身就聽得多嗟，估唔到鬼都可以做替身喎」。
哇：「喎」旣第一種用法，新會話一般用「哇」, 讀waa23。
唄：
讀beh3 /weh3，助語詞。用於句尾或者句與句之間，又或者相當於「噃」旣輕聲讀，有時會有種調皮或者輕佻旣感覺。
如：「好犀利唄」，「好勁噉唄」，「我無話過養你唄」。
又如許冠傑旣攺篇歌『一水隔天涯』歌詞：「咪話妹佢唔捱義氣唄」，另一首歌『佛跳牆』：「計起呀完全就唔係貴唄，翅肚呀能潤肺唄」。
嘅噃/嘅啵：
覺得對方睇法唔啱，而去糾正佢。上文講過「嘅」用於形容詞、代詞同動詞之後，所以此處亦一樣。如：「呢支野係黑色嘅噃」，「係噉樣嘅啵」，「係佢打嘅噃」，「我實會噉做嘅噃」。
又可以代替「箇喎」（如下），且語氣有所減弱。
箇喎：
表達一種意想不到或不解旣感覺。都係此例：「就係識講咋喎，但係又唔使記得佢啲文字呀同字母箇喎。」又如：「吖，估唔到佢又會噉樣箇喎」。
又可以代替「嘅噃」，且語氣有所加強。
掛：
讀gwaa3，尾助詞。表唔敢肯定；或用於反問句，表示問人係唔係眞係咁肯定。如：「可能錯咗掛」，「唔係掛？」
吓：
讀haa2，助語詞。
其一：疑問助詞，表示聽唔清對方講旣說話，要求講多次。如：「吓，你講咩話？」
其二：尾助詞，喚起人注意。如周星馳電影『國產淩淩漆』臺詞：「嗱，咪住先啊，我冤枉架吓！」「小心啊吓！」「快做晒啲野啊吓！」。
吓哇：
有時講講下話，突然間中斷，「吓哇」一聲，作一個反問，卽係問下人同唔同意，作個短暂旣停頓，喚起聽衆思考。相當於「係咪啊」旣連讀。
呢：
讀ne1，助語詞。使語氣委婉，用於以下三種情形：
其一：用於疑問句尾，使語氣委婉，聽起來更舒服。如：「如果噉做呢？」「呢道題點樣做呢？」
其二：亦起陳述句中作停頓，畀啲時間聽衆去思攷，亦都使語氣更加委婉。如：「第一呢，係……第二呢，就係……」，「佢呢，話呢……」。
其三：表達一種想象旣情形，實際還未發生。如：「我想打死佢呢」，「佢仲話佢會返來呢」。
嘅呢：
日語？不過如果粵語中，「嘅」正好用於形容詞、代詞同動詞之後，又恰好符合「呢」旣情況，都可以用「嘅呢」喎。如：「支筆係唔係黑色嘅呢？」
喇：
讀laa3，尾助詞。有五種作用：
其一，用於句末，以表達事情已經到達咗某一程度或進展。如：「做完晒啲野喇」，「佢已經大個仔喇」。
其二，用於祈使句，使語氣委婉。如：「快去做野喇」。
其三，應人，表示唔耐煩。如：「得喇！」「我知喇！」
其四，用於兩句之間作停頓，或用於句尾，使語氣委婉之餘，又加強音量，使聽者留意接落來旣內容，如「侍從就話喇……」，「因爲粗口太不雅喇，此文唔一一列舉」。
其五，讀laa4，用於詢問「是否」旣疑問句尾，使語氣委婉。如：「做完晒啲野喇？」
吖喇：
變音讀eh1 leh4。其實就相當於「吖」同「喇」兩種用法聯合。如：「幾咁吽吖喇」。
架喇：
尾助詞。陳述一直存在旣狀態，或以前己經發生旣事。如：「係噉架喇」，「儲起咗好耐架喇」。
再如小弟之前寫旣一篇文，其中有句：「『洗塵』呢個詞我地就經常掛起口邊架喇。」
旣喇：
尾助詞，同「架喇」，祇係語氣稍爲輕啲。
如香港某集電臺節目講「廣東人學英語」，其中有句話：「所以你請個泰傭欸，返來呢，無幾耐呢，一個禮拜佢就可以講你啲話旣喇」
咋喎：
前文講過「咋」係相當於「而已」，而加個「喎」呢就會使語氣委婉。
如香港某集電臺節目講「廣東人學英語」，其中有句話：「就係識講咋喎，但係又唔使記得佢啲文字呀同字母箇喎。」
再如筆者之前有篇文中有句：「貌似北方人都祇係識「做飯」、「做菜」、「做雞」敢咋喎，何來多種烹調方式啊？」
前文所講過表示「而已」旣助語詞，其中：「之嘛」係一般用法；「嗟」句話會顯得有自信；「咋」顯得唔耐煩；「咋喎」一般會有嫌少旣感覺。
喇喎：
上邊講咗「咋喎」一般會有嫌少旣感覺，而「喇喎」就有嫌多旣感覺。因爲「喇」本身有表達事情已經到達咗某一程度旣意思。如：「已經有好多喇喎」。
又如香港「毛記」一齣廣告短片有句對話，A講：「三日喇喎。」B講：「三日咋喎。」一個嫌太耐無見面，另一個認爲三日好短嗟。
亦有用於祈使句叫人停止做某啲事，意思係對方做呢啲事已經有一段時間。如：「你好放手喇喎」。
架喇喎：
相當於「喇喎」。如：「已經好耐架喇喎」。
啦：
讀laa1，尾助詞。有四種作用：
其一，用於祈使句，語氣委婉之餘，又會有少少唔耐煩旣感覺。如：「快做晒啲野啦！」「快啲啦！」「過來啦！」。
其二，應人，表示唔耐煩，語氣強過「喇」。如：「得啦！」「我知啦！」「我已經做完晒啲野啦！」
其三，表示好肯定一件事，或者自己批過旣事真係實現咗。如：「係佢啦，實係佢啦！」「嗱，我都話啦！」，「講咗啦！」
其四，表突然間諗到啲問題。如：「係啦，你係邊度人啊？」
其五，質問人或不滿旣語氣。如：「你玩晒啦！」「我聽日都一樣要返工啦！」
架啦：
尾助詞。表示好肯定一種狀態一直存在，或者自己批過旣事真係實現咗。「係噉架啦」，「嗱，我都話架啦」，「講咗架啦」。
吖：
讀aa1，尾助詞。
其一，講話時似有心理活動。如：「至少可以好啲吖」。
其二，用於祈使句，有啲似「啦」旣懶音。如：「畀我吖」。
其三，用於反問句。如：「你識咩吖？」
笨：
讀ben6，助語詞。一般同人講完一句話之後，加個「笨」字，就好有凶人旣効果。如果同個「吖」連用，就會更增震憾旣効果。但用呢個助語詞會帶來未可預知旣後果，愼用。如：「打我吖，笨！」「爭咩吖？溝埋一齊做瀨尿牛丸吖，笨！」
哩：
讀le1，助語詞。
其一，表突然間諗到啲問題，有啲似「啦」旣懶音。如：「係哩，你係邊度人啊？」
其二，用於疑問句末，似「呢」旣懶音。如：「佢哩？」「你起度做咩哩？」
咧：
讀le5，尾助詞。
其一，用於反問句，通常同「誒」連用。如：「型誒咧？」「係咧？」「係誒咧？」
其二，尾音拉長表示唔耐煩。如：「係咧。都話係咯！」
嘞：
讀laak3，尾助詞。此字係入聲韻，用於句尾，相當於「喇」旣加強版，畀人斬釘截鐵旣感覺，表明言者對佢句話好有自信，好肯定。如：「係噉架嘞！」「噉就唔使驚嘞！」「把風扇已經舊咗嘞！」或好有決心，語氣堅決。如：「我準備走嘞！」其甚者可達至振懾對方旣効果。如：「無錯嘞！」普通話無入聲韻，呢種効果係普通話所無可比擬嘅。
入聲韻亦會有停頓感，故亦會使成句話講完有停頓旣感覺，好似舒咗一啖氣噉，所以一般亦會用於段尾。如：「到此爲此講完嘞！」
咯：
尾助詞。
讀lo1，有如下作用：
其一：有「算啦」旣意思，如：「由佢咯」。
其二：潛臺詞係「就係噉之嘛」。如：「就係噉咯」，「佢講旣咯」，「咁啱見到，而我又識，咪冒昧講講咯」。
其三：潛臺詞係「噉你都唔識」或「你而家先知？」如：「呢塊係餅咯」，「咪係咯」。
其四：發短促音，或帶有敷衍人地問題旣語氣。如：「勁咯」，「好玩咯」。
其五：將尾音拉長，用以串人，如：「我唔會怕佢咯」，「唔關你事咯」，「唔覺得咯」。有時又會用反話旣形式來講，如：「我好驚咯」。
又讀lok3，變成入聲韻，語氣堅決之中帶點唔耐煩。如：「都話咗係噉咯」，「都話係咯」。
去片：
囉：
尾助詞。
讀lo4，有以下作用：
其一，常同「係」連用，發音短促，作「係囉」，附和人地。
其二，表示唔同意人地旣意見，尾音稍拉長，如：「係佢囉」，「唔係佢囉」。
此外，還讀lo3，有以下作用：
其一，作嘲諷語氣。如：「巴閉囉」。
其二，用於祈使句，語氣係非常之婉轉。如：「來，睇住囉」，「快囉，快囉」。
又可作歌助詞。
呃：
讀aak3，尾助詞。都係入聲韻，串人旣語氣。如：「係呃！」「無呃！」
格：
讀gaak3，尾助詞。有音無字，暫且借用住「格」字。又或者係「架」旣變音，但係入聲韻，語氣比「架」要肯定。如：「幫人下載埋落來先得格」，「你知格」。
咩：
讀me1，尾助詞。除咗表「乜野」之外，還可以作尾助詞，用於反問句尾，使語氣委婉。如：「你唔知咩？」。
古文對應旣助語詞係「邪」，讀je4。
麼：讀mo22。新會話（四邑話）用「麼」表達「咩」。如：「你唔知麼？」。
嘅咩：
用於反問句尾，加強「咩」旣語氣，如：「你唔知旣咩？」
乜：
讀mat1，反問句發語詞。以提醒人你要用反問句，且加強語氣。譬如有人旣文章中寫左「廿十」，我就好想問佢一句：「乜『廿』後邊還要加『十』旣咩？」再如：「乜你唔知旣咩？」加強「你唔知旣咩？」旣語氣。
咪：
讀mai6，其實相當於「唔係」旣連讀，表反問。如：「我咪一樣？」其實一般人都會當呢句係陳述句，係因爲太常用，而無留意，佢相當於講：「我唔係一樣？」係一個反問句。
嘛：
讀maa3或maa4，尾助詞。
其一，作疑問助詞。如：「係嘛？」，「噉樣做啱嘛？」
其二，表示認同人地講旣野，不過有嫌人地太遲先知旣言氣，潛臺詞係「乜你而家先知？」如：「就係嘛」。
其三，事後指讁人地應該點做。如：「快啲嘛」。
啊嘛：
尾助詞，用作反問句。如：「唔係啊嘛？」
啦嘛：
尾助詞，事後指讁人地應該點做。如：「做快啲啦嘛」。
又表示認同人地講旣野，不過有嫌人地太遲先知旣言氣。如：「係啦嘛」
又可作「吖嘛」，而語氣稍輕。
架嘛：
尾助詞，用於符合「架」架情況，又使語氣委婉。如：「我斯文人來架嘛」，「我以爲噉樣得架嘛」，「做快啲先得架嘛」。
喔：
讀o6，助語詞，表示了解。呢個字好多人受咗北方話旣影嚮，寫成咗「哦」，其實係錯旣，正確其實係「喔」，。如：「喔，知道。」
哦：
讀o2，疑問助詞。此字好多人受咗北方話影嚮，用作表示「喔」，非也。實質爲疑問助詞，表示不解。如：「哦？係咩？」
咦：
讀ji2，疑問助詞。表示突然間發現咗啲不明旣野。如：「咦？咩來架？」
嗱：
讀naa4，助語詞。指出某物，或畀物品過對方。如：「嗱，畀你！」
吖嗱：
疑問助詞，問件事係真眞抑或假。如：「你地話佢係抄定自己寫吖嗱？」「鐵頭功吖嗱？」
之：
讀zi1，助語詞，無實義，使語氣委婉。如：「之不過」，「卒之」，「換言之」，「然之後」，「十分之」，「非常之」，「更加之」，「唔怪之得」，「久而久之」，「極之確定」。
而新會話（四邑話）亦用作尾助詞（讀zi23）。如：「快做晒乃（新會話旣「啲」）野之」，「來卬（ngok11我地）址（呢度）玩下之」。
新會話此用法其實係沿用自古文，如：
『孔子家語・六本』曾子耘瓜(起瓜地度除草)，誤斬其根。曾皙(曾子老豆)怒，建大杖以擊其背，曾子仆地（puk1向前跌落地）而不知人久之。
王符『潛夫論・論榮』夫令譽從我興，而二命自天降之。
蔡邕『獨斷』元帝額有壯髮，不欲使人見，始進幘服之，羣臣皆隨焉。
乎：
讀fu4，助語詞，從古文中沿用落來，無實義，使語氣委婉。如：「於是乎」，「危危乎」，「幾乎」。
於是乎：粵語沿用自古語，譬如下：
漢劉向『說苑・至公』子亡之，我存之，於是乎觀楚一存一亡也。
後漢徐幹『中論・貴言』然後可以發而步遠，功察而治微；於是乎闓（開）張以致之。
者：
讀ze2，助語詞，從古文中沿用落來。
有時無實義，如：「或者」、「再者」。
有時指代某人或某物，如：「第三者」，「騱（hai4），馬之前足皆白者。」。
然/焉：
讀jin4，助語詞，有乜乜之貌旣意思，從古文中沿用落來。如：「雖然」，「果然」，「若然」，「心不在焉」，「若焉」，「施施然」，「飄飄然」，「貿貿然」。
再如：『列子・仲尼』瞻之在前，忽焉在後。
『禮記・檀弓』貿貿然來。
過：
讀gwo3，助語詞，一般用於要畀啲野某人旣時候，做一個承接功能，使成個句子更飽滿。如「畀個地址我」可以講成：「畀個地址過我」。
話：
其一，讀waa6，助語詞，如古文亦會以「言」作助語詞。如：「譬如話……」，「雖則話……」。「言」如今某啲情況亦有用，如：「總言之」，「換言之」。
其二，讀waa2，疑問助詞，表示以前聽人講過，但自己忘記咗，重新問返人。如：「台山個本字係『台』，根據係點樣話？」「個日期係幾時話？」
來：
讀lai4，助語詞，用於定義事物旣屬性之後。如：「呢個係好野來」，「識煲靚湯更加係廣東好女仔一等一旣優點來」。
釐：
讀lei4，助語詞，用於「無」之後，加強「無」旣語氣，取毫釐之意，義同毫無，卽絲毫都無。
如：「無釐味道」感覺就要淡過「無味道」好多喇，簡直就係完全無味道旣感覺。再如許冠傑旣『制水歌』歌詞有：「又制水，拍拖都無呀釐味。」
其餘還有：「無釐頭尻」，「無釐禮貌」，「無釐拏（naa1）更」，「無釐正經」，「無釐醒目」，「無釐神氣」，「無釐傝（daap3）㒎（saap3）」，「頭尖額窄，無釐貴格」等。
也：
讀jaa5，助語詞，從古文中沿用落來，雖然好少用，但都有適用旣時候。譬如有啲人好鍾意講：「非也！非也！」
鬼：
廣東話中，還會用粗口中旣人體器觀做助語詞，用於副詞之後，來加強語氣。不過實在太不雅，此文唔一一列舉。但通常可以用隻「鬼」來代替。鬼搵替身就聽得多嗟，估唔到鬼都可以做替身喎，仲可以做人體器觀旣替身添，問你驚未？如：「好鬼得人驚啊！」「鬼火咁靚！」「鬼火都無咁靚！」
還用於疑問代詞後，作問句，如：「乜鬼野？」「點鬼知？」又可以連疑問代詞都慳（haan1）埋，如：「鬼知？」
用於動詞後，表反問，如：「仲做鬼做馬咩？」「呃鬼（食豆腐）咩？」
有時「鬼」又可以用叉同Q代替，最新有人用L代替。
（有怪莫怪，細佬哥唔識世界）
否定詞：
廣東話還會用否定詞作助語詞，加否定詞後仍係原意，但語氣係強咗。如：
間中：間唔中；
自然：自不然；
周時：周不時；
陰功：無陰功；
更之：更不之；
點知：點不知；
誰知：誰不知（殊不知，讎不知）；
每時每刻，時時刻刻：無時無刻
其他：
還有一啲特殊用法，組成故定詞組。如「冚罷唥」個「罷唥」（此詞旣正字暫未有定論）。
有啲故定詞組係疊字。有：肥腯腯（dat1），濕納納，齊緝緝，軟腍腍（nam4），鞋澀澀（saap3）。諸如此類。
其中「齊緝緝」至少有三種表達方式，如：
齊緝緝
『儀禮・喪服』傳曰：齊者何？緝也。
齊輯輯
『列子・湯問』推於御也，齊輯乎轡銜之際，而急緩乎脣吻之和。
齐戢戢
唐張籍『採蓮曲』青房圓實齊戢戢，爭前競折漾微波。
友情链接