当前位置: 首页 >机型选购 >粤语日快乐!

粤语日快乐!

2021-01-08 22:51:20

什么是粤语日
粤语日
是一个坊间节日。关于这个节日的内涵有许多不同的理解,最大的共识可能是7月25日这个日期,今年是第五个粤语日。

  个人认为,粤语日可理解为跟母亲节差不多的节日。母亲节是什么样的节日?大家可以表达对自家妈妈的爱和感激,可以表达对天下所有母亲的敬意,但我们不会因为庆祝母亲节就去贬低父亲,或者为了抬高自己的母亲而贬低别人的母亲。

  同理,在粤语日,我们可以为粤语的悠久历史文化和近现代汉语演变中的贡献而自豪,也可以为保护汉语的语言多样化而打气。但粤语日不是排外日,不是反普日,粤语也不通过需要夸大自己或者贬低别人来寻找自己的存在感。

  Love you as you are.
为了“应节”,或者“做节”,推送一篇2012年发表于南方都市报的旧文。原文以粤语文(vernacular Cantonese)写成,既然是粤语日,就不改写成现代文(Standard Modern Chinese)了。
推普废粤的末日命题
原文刊于南方都市报,2012年
论尽母语

□瓜瓜(南方都市报 www.nddaily.com)

呢两三年,粤语生态进入咗多事之秋。每一次事发,媒体同街坊嗰种肉紧法都令人有一种末日感。先有先烈东路小学嘅“广州话日”突出咗广州细路唔识讲广州话嘅问题,之后有执信南路小学唔准学生在校讲广州话,跟住系著名嘅“粤语改普语播音提案”,街坊捍卫粤语嘅呼声一时无两。面对群情汹涌,市领导再三澄清绝无“推普废粤”嘅意图。年前,因为一条“明年3月起粤语播音须报批”嘅新闻,市领导又再次攞“伪命题”说嚟救火。噉乜嘢先至系真命题呢?点解街坊心里面对于“推普废粤”嘅恐惧始终存在呢?呢种末日情结系咪真系多余嘅呢?

今次嘅政策系依据2001年颁布嘅《国家通用语言文字法》制定,具有毋庸置疑嘅法律效力。有人话只要我们自己坚持讲白话,使乜怕咩政策———喺危机面前盲目乐观无异于慢性自杀。旧年,我喺市内小学做资料搜集嘅时候亲身体会到政策嘅无孔不入。推普嘅文件系层层下达,环环相扣,一间学校能否成为“语言文字规范化学校”,同学校、区、市教育局嘅成绩,甚至创文都有亲密关系。呢啲评比嘅细则多到几乎要规定师生去厕所嘅时候要讲咩话。一旦检查组发现老师喺校内同学生讲白话,轻则扣分,重则一票否决学校资格。呢种评分规定无疑明示师生,喺校内讲白话系唔啱或者至少系唔受欢迎嘅行为。虽然评比过后师生可能马照跑舞照跳,但系都受到明显嘅心理“暗”示嘞。

呢次领导又讲嘞,我哋以前冇,以后都唔会限制粤语播音。哇,听落好似几放心噉喔。不过瓜瓜提醒大家,从2009年起(或者更早),国家语委嘅领导就多次喺公开场合表示推普唔等于抵制地方方言,重话要大力保护中华民族嘅语言文化。几年过去,推普政策层出不穷,但系保护方言文化嘅有效措施呢?影都冇。咁大细超,又点怪得街坊会信唔过政府保护方言文化嘅决心呢?所谓“讲就天下无敌,做就有心无力”。睇睇推普政策就知道,有心自然就有力。所以话到尾,都系“无心”啫。如果再系噉样空口讲白话,唔系猫哭老鼠假慈悲又系咩呢?

噉到底大家私下坚持讲白话可唔可以阻止白话流失呢?一种语言嘅流失唔单指使用者人数嘅减少,亦包括使用者语言水平嘅下降,以及呢种语言所应用嘅社会领域嘅减少。所以街坊对于细路嘅白话“唔咸唔淡”,同埋对于白话节目份额缩水嘅担忧,并非无病呻吟。而家好多细路已经想象唔到当年嘅才子吟诗作对,指点江山时讲嘅正系方言,因为喺佢哋有生之年,众多方言都已经被退出呢啲严肃嘅公共领域,沦为只用于谈论茶余饭后八卦嘅的工具,呢啲就系典型嘅流失。政府嘅“伪命题”论之所以唔得民心,系因为政府同街坊对于“废粤”嘅理解有条巨大嘅鸿沟。街坊认为只要推普政策导致白话喺前文所道嘅任何一个层面上流失,就系“废粤”;官方认为,只要冇明令禁止街坊喺私人空间里面讲白话就唔算“废粤”。粤语喺呢啲严肃嘅公共领域算系烂船都重有三斤钉。但广东媒体能够用白话播音系有历史原因嘅,属于“法外开恩”,点知呢块“免死金牌”几时会被收返呢?末日情结多少同呢块唔多稳阵嘅金牌有关系。正所谓,比死更难受嘅事情系等死。
其实,广东实行“一文多语”已经好多年,普通话水平不断提高,本土语言文化都冇显著衰减,新粤人顺利融入当地社会,乐于亦善于学习当地语言。粤语同流行文化不断北上,亦丰富咗各地嘅语言文化生活。可以话,广东已经成为实行多语制从而促进人群融合同文化繁荣的成功例子。任何企图将粤语赶出公共领域嘅政策都系无视呢种和谐与成功,人为噉制造普粤关系的死结。
附:
粤语日海报,由羊城网制作。
Copyright © 2023 All Rights Reserved 版权所有 香港粤语音乐分享社