高级粤语学习:麦兜看医生

2021-07-23 04:50:36

麥太：醫生呀，個小朋友 un 腳呀。

醫生：下？

麥太：我話個小朋友成日 un 腳呀。

醫生：咁... 關我咩事呀？

麥太：你係醫生呀嘛！

醫生：咁點呀？

麥太：咁咪醫囉，內外全科呀嘛你。

醫生：唔好意思，內外全科，唔包 un 腳。

麥太：下？咁內外全科包啲乜野架？

醫生：一般野囉！

麥太：點一般法呀?

醫生：普通病囉！

麥太：點普通呀？

醫生：普普通通，頭暈身慶咁囉！

麥太：仲有呢？

醫生：仲有小兒驚風、外感發冷、無名腫毒、外傷骨折、腸胃不適、疴嘔肚痛、四時感冒腰酸背痛、小便不暢、脂肪積聚、性慾減退、大頸泡、大眼肚咁囉！

麥太：仲有冇呀？

醫生：仲有嗰啲皮膚痕癢、精神緊張、健忘失眠、暗瘡頭皮、痱滋、小腸氣、腎水不足、頭暈耳鳴、口乾舌燥、生蛇、生癬、屁股生瘡、尿頻、雞眼、胃酸過多、膽固醇過高、吐血、嘔奶鼻塞塞嗰啲囉！

麥太：仲有呢？

醫生：仲有發吽哣、發雞盲、發瘟、發 ti 騰、飛蚊症、發耳賺、口淡淡、面青青、生蟲、生漬、車呔肚、鬼鼠肉、拜拜肉、出水痘、生鼓脹、秃頭、大無腦、大眼的 dot、蚊叮蟲咬、鴨乸腳、 un 腳、主婦手、香港腳...

麥太：啊！你講左 un 腳！

醫生：我幾時有講 un 腳呀？

麥太：我聽住你話 un 腳架啦！

醫生：我先至唔會。

麥太：拿你明明話，發吽哣、發雞盲、發瘟、發 ti 騰、飛蚊症、發耳賺、口淡淡、面青唇白、生蟲、生漬、車呔肚、鬼鼠肉、拜拜肉、出水痘、生鼓脹、秃頭、大無腦、大眼的 dot 、蚊叮蟲咬、香港腳、鴨乸腳、同埋 un 腳喎！

醫生：我點會咁講呀？！

麥太：咁你講咩呀？

醫生：講緊啲普通病囉！

麥太：點普通呀？

醫生：普普通通，傷風咳嗽囉！

麥太：仲有呢？

醫生：仲有嘔黃膽水、夜尿、打乞痴、流鼻涕、扁桃腺炎、腳丫痕癢、骨質疏鬆、胃腩下垂、打思億。

麥太：好似仲有播！

醫生：仲有呢個懵口懵面、戚眉戚眼、耳後見腮、尖寒尖凍、肌肉酸痛、姣私燉篤、風濕骨痛、喉嚨腫痛、攣頭縮頸、腰長腳短、心神恍惚、腳仔軟軟、疴爛 bat 、發牙痕、汗多、潮熱、脫髮、甩毛、前列腺發、大眼的 dot、發吽哣、發雞盲、飛蚊症、發耳賺、髀擘擘、眼睥睥、鬼鼠肉、拜拜肉、痴孖筋、長短腳、鴨乸腳、主婦手、un un 腳、香港腳...

麥太：拿！又講 un 腳勒！又講勒！

醫生：我睇你真係發耳賺播！

mak6 taai3 ：ji1 saang1 aa4 ，go3 siu2 pang4 jau5 un goek3 aa3 。

ji1 saang1 ：haa2 ？

mak6 taai3 ：ngo5 waa6 go3 siu2 pang4 jau5 sing4 jat6 un goek3 aa3 。

ji1 saang1 ：gam2 ... gwaan1 ngo5 me1 si6 aa3 ？

mak6 taai3 ：nei5 hai6 ji1 saang1 aa1 maa3 ！

ji1 saang1 ：gam2 dim2 aa3 ？

mak6 taai3 ：gam3 mai1 ji1 lo1 ，noi6 ngoi6 cyun4 fo1 aa1 maa3 nei5 。

ji1 saang1 ：m4 hou2 ji3 si3，noi6 ngoi6 cyun4 fo1 ，m4 baau1 un goek3 。

mak6 taai3 ：haa2 ？Gam2 noi6 ngoi6 cyun4 fo1 baau1 di1 mat1 je5 gaa3 ？

ji1 saang1 ：jat1 bun1 je5 lo1 ！

mak6 taai3 ：dim2 jat1 bun1 faat3 aa3 ?

ji1 saang1 ：pou2 tung1 beng6 lo1 ！

mak6 taai3 ：dim2 pou2 tung1 aa3？

ji1 saang1 ：pou2 pou2 tung1 tung1 ，tau4 wan4 san1 hing3 gam2 lo1 ！

mak6 taai3 ：zung6 jau5 ne1 ？

ji1 saang1 ：zung6 jau5 siu2 ji4 ging1 fung1 、ngoi6 gam2 faat3 laang5 、mou4 ming4 zung2 duk6 、ngoi6 soeng1 gwat1 zit3 、coeng4 wai6 bat1 sik1 、o1 au2 tou5 tung3 、sei3 si4 gam2 mou6 jiu1 syun1 bui3 tung3 、siu2 bin6 bat1 coeng3 、zi1 fong1 zik1 zeoi6 、sing3 juk6 gaam2 teoi3 、daai6 geng2 paau3 、daai6 ngaan5 tou5 gam3 lo1 ！

mak6 taai3 ：zung6 jau5 mou5 aa3 ？

ji1 saang1 ：zung6 jau5 go2 di1 pei4 fu1 han4 joeng5 、zing1 san4 gan2 zoeng1 、gin6 mong4 sat1 min4 、ngam3 cong1 tau4 pei4 、fai2 zi1 、siu2 coeng4 hei3 、san6 seoi2 bat1 zuk1 、tau4 wan4 ji5 ming4 、hau2 gon1 sit6 cou3 、saang1 se4 、saang1 sin2 、pei3 gu2 saang1 cong1 、niu6 pan4 、gai1 ngaan5 、wai6 syun1 gwo3 do1 、daam2 gu3 seon4 gwo3 gou1 、tou3 hyut3 、au2 naai5 bei6 coi3 coi3 go2 di1 lo1 ！

mak6 taai3 ：zung6 jau5 ne1 ？

ji1 saang1 ：zung6 jau5 faat3 hung1 dau6 、faat3 gai1 maang4 、faat3 wan1 、faat3 ti tang4 、fei1 man1 zing3 、faat3 ji5 zaan6 、hau2 taam5 taam5 、min6 cing1 cing1 、saang1 cung4 、saang1 zi3、ce1 taai1 tou5 、gwai2 syu2 juk6 、baai3 baai3 juk6 、ceot1 seoi2 dau6 、saang1 gu2 zoeng3 、tuk1 tau4 、daai6 mou4 nou5 、daai6 ngaan5 dik1 dot 、 man1 ding1 cung4 ngaau5 、ngaap3 naa2 goek3 、 un goek3 、zyu2 fu5 sau2 、hoeng1 gong2 goek3 ...

mak6 taai3 ：aa1 ！nei5 gong2 zo2 un goek3 ！

ji1 saang1 ：ngo5 gei2 si4 jau5 gong2 un goek3 aa1 ？

mak6 taai3 ：ngo5 ting3 zyu6 nei5 waa6 un goek3 gaa3 laa1 ！

ji1 saang1 ：ngo5 sin1 zi3 m4 wui2 。

mak6 taai3 ：naa4 nei5 ming4 ming4 waa6 ，faat3 hung1 dau6 、faat3 gai1 maang4 、faat3 wan1 、faat3 ti tang4 、fei1 man1 zing3 、faat3 ji5 zaan6 、hau2 taam5 taam5 、min6 cing1 seon4 baak6 、saang1 cung4 、saang1 zi3 、ce1 taai1 tou5 、gwai2 syu2 juk6 、baai3 baai3 juk6 、ceot1 seoi2 dau6 、saang1 gu2 zoeng3 、tuk1 tau4 、daai6 mou4 nou5 、daai6 ngaan5 dik1 dot 、man1 ding1 cung4 ngaau5 、hoeng1 gong2 goek3、ngaap3 naa2 goek3 、tung4 maai4 un goek3 waa1 ！

ji1 saang1 ：ngo5 dim2 wui2 gam3 gong2 aa1 ？！

mak6 taai3 ：gam3 nei5 gong2 me1 aa1 ？

ji1 saang1 ：gong2 gan2 di1 pou2 tung1 beng6 lo1 ！

mak6 taai3 ：dim2 pou2 tung1 aa1 ？

ji1 saang1 ：pou2 pou2 tung1 tung1 ，soeng1 fung1 kat1 sau2 lo1 ！

mak6 taai3 ：zung6 jau5 ne1 ？

ji1 saang1 ：zung6 jau5 au2 wong4 daam2 seoi2 、je6 niu6 、daa2 hat1 ci1 、lau4 bei6 tai3 、bin2 tou4 sin3 jim4 、goek3 aa1 han4 joeng5 、gwat1 zat1 so1 sung1 、wai6 naam5 haa6 seoi4 、daa2 si1 jik1 。

mak6 taai3 ：hou2 ci5 zung6 jau5 bo3 ！

ji1 saang1 ：zung6 jau5 ne1 go3 mung2 hau2 mung2 min6 、cik1 mei4 cik1 ngaan5 、ji5 hau6 gin3 soi1、zim1 hon4 zim1 dung3 、gei1 juk6 syun1 tung3 、haau4 si1 dan6 duk1 、fung1 sap1 gwat1 tung3 、hau4 lung4 zung2 tung3 、lyun1 tau4 suk1 geng2 、jiu1 coeng4 goek3 dyun2 、sam1 san4 fong2 fat1 、goek3 zai2 jyun5 jyun5 、o1 laan6 bat 、faat3 ngaa4 han4 、hon6 do1 、ciu4 jit6 、tyut3 faat3 、lat1 mou4 、cin4 lit6 sin3 faat3 、daai6 ngaan5 dik1 dot 、faat3 hung1 dau6 、faat3 gai1 maang4 、fei1 man1 zing3 、faat3 ji5 zaan6 、bei2 maak3 maak3 、ngaan5 pai5 pai5 、gwai2 syu2 juk6 、baai3 baai3 juk6 、ci1 maa1 gan1 、coeng4 dyun2 goek3 、ngaap3 naa2 goek3 、zyu2 fu5 sau2 、un un goek3 、hoeng1 gong2 goek3 ...