有啲詞彙，嚮粵語入邊係文白兼用，卽係除咗我地日常習慣口語常講之外，還可以用於書面語，而普通話則祇見書面用，好少聽人講。當然，響粵語用得口語，就絕對可以作書面語啦！
上回舉咗「食指動」、「幾何」、「爆棚」、「俗語」、「貿貿然」、「度」呢幾個例，究其原因，可能係普通話讀呢啲詞時發音不便，或普通話同音字多，讀起來會同其他詞混淆，而書寫就無問題。但呢啲詞，好多係沿用自古文，祇係普通話口語上消失咗，粵語沿用。今次呢篇再挖掘多幾個噉樣旣詞。
譬如
上回講到「幾何」呢個詞，舉咗曹操旣詩『短歌行』爲例：
對酒當歌，人生幾何。
譬如朝露，去日苦多。
呢首詩入邊還有「譬如」一詞，普通話口語當中好少會有，但書面會寫。但廣東話就成日聽人講喇。我地講野就經常會話：「譬如話……」
噉「譬如」就係沿自古語旣，古文就常有，除咗上文旣『短歌行』外，還有如：
『說苑 建本』湯稱學聖王之道者，譬如日焉；靜居獨思，譬如火焉。
『賈誼新書 脩政語上』湯曰：學聖王之道者，譬其如日；靜思而獨居，譬其若火。夫舍學聖之道，而靜居獨思，譬其若去日之明於庭，而就火之光於室也。（註，「其」乃助語詞，可省去。若亦如之意。）
洗塵
「洗塵」呢個詞我地就經常掛起口邊架喇，有時講得多，眞係會以爲佢祇不過係個口語咁簡單。噉係唔係呢？我地來睇下。「洗塵」係指設宴歡迎遠來或歸來之人。如：「閣下遠道而來，舟車勞頓，容我幫你洗洗塵。」普通話或者口頭上係「接風」講得多，而書面上亦會寫洗塵。噉使塵會唔會好俗呢？來睇下以下古文：
『楚辭 屈原 九歌 大司命』令飄風兮先驅，使涷dung1雨（暴雨）兮灑塵（灑塵卽洗塵）。
『水滸傳 第三十三回』請宋江更換衣裳鞋襪，香湯沐浴，在後堂安排筵席洗塵。
『儒林外史 第九回』秦老又備酒與他洗塵。
挨晚
挨晚，亦卽係「傍（bong6）晚」，因爲挨意思係靠近、挨近、擁擠旣意思，如：「佢挨埋來」，亦係沿自「挨」字古義，如：
『紅樓夢』寶玉挨身而入。
王安石『和王微之登高齋』對壘每欲相摩挨。
所以挨晚就係近晚、傍晚旣意思。而唔單止係廣東人口語上講，其實都係來自古人之書面語（估計古人亦會去講），而普通話書面語中亦不少使用。
『紅樓夢』賈母道：「如今且坐下，大家喝酒，到挨晚再到各處行禮去。」
捩轉
捩：折也，拗（ngaau2）也，扭也。捩係個多音字，有lai6 / lai2 / lit6音。lit6音一般用於「轉捩點」。
讀lai6 / lai2音，詞有「捩手」，「捩轉」，「捩轉身」，「捩轉手」，「瞓捩頸」。
如：「捩手揼左件垃圾」，「股市昇捩下手就賺到笑」，「捩手擗（pek6掉垃圾也）咗佢」，「捩轉頭就唔記得咗」。再如：
『韓愈 送窮文』捩手翻羹。
明湯顯祖『邯鄲記 度世』呀，一道清氣，貫於燕之南，趙之北。不免捩轉雲頭，順風而去。
另亦有「戾」字：「戾橫折曲」。戾同捩。又作：挒，攦。
攦：與捩音義同。如：「攦手擗咗佢」，卽「捩手擗咗佢」。
再如：『莊子 外篇 胠篋』毀絕鉤繩而棄規矩，攦工倕之指，而天下始人有其巧矣。
廢話好似多咗啲，但睇到上邊旣內容，估計大家都了解嘞，「捩手」，「捩轉」等唔單止係粵語口語，還係沿自古語，係雅言。普通話口語就唔會去講架喇，至於書面上呢？請睇下例：
和訊網『新一輪洗牌下的格局震盪』2012年相對於此前的兩年而言，是大中型房企可以尋求業績捩轉的一年。
搜狗百科「司馬遹」詞條：自此，他的人生出現捩轉，死亡的陰影開始籠罩他的生命。
張曉凌『東方的自覺與徹悟』1985 年後,他（唐近豪）的創作發生了歷史性的捩轉,從『霧中花』到「銀河系列」,徹底擺脫了具象的糾纏。 （張曉凌：敎授、中國國家畫院副院長）
嘔血
嘔血，普通話口語係「吐血」。但啲個動作用「吐」查實係唔啱旣，呢個係普通話之謬。因爲吐祇係從口出嗟，嘔係從身體內部出旣。所以呢，普通話嚮書寫旣時候，要準確表達呢個動作，都係會用「嘔血」旣，但平時講野卻唔求準，真係「求其是但」。睇古人點寫：
『左傳』既戰，簡子曰：「吾伏弢（tou1箭袋）嘔血，鼓音不衰，今日我上也。」
『史記 扁鵲倉公列傳』王令人召之，即仆（puk1向前跌）於廁，嘔血死。
『史記 扁鵲倉公列傳』慎毋（mou2唔好）為勞力事，為勞力事則必嘔血死。
後生
後生，普語叫「年輕人」，但普語書面亦會用「後生可畏」一詞。但古人唔講「年輕人，卻常常講後生。如：
『儀禮』兄弟之後生者舉觶（zi3古代一種酒杯）于其長（輩）。
『墨子 非儒下』夫為弟子後生，其師必修其言，法其行，力不足知弗（fat6唔）及而後已。
『墨子 耕柱』（耕柱子）毋幾何（無幾久）而遺（贈）十金於子墨子曰：「後生不敢死，有十金於此，願夫子之用也。」
『墨子 耕柱』後生有反子墨子而反者。
漢劉向『新序 雜事五』故孔子曰：「後生可畏，安（點）知來者之不如（及）今？」
匙羹
匙羹，就係「羹匙」旣調轉讀。普語口語叫「勺子」北方亦有講「調羹」。
羹，嚮古代指肉汁，肉湯，古人用匙來「畢」羹食，所以叫羹匙。
祇係唔知咩原因，粵語將佢調轉讀，而成「匙羹」。有人話係百越民用詞習慣，似越南話詞序（由於篇幅原因，此處唔細講，有興趣可以自己去查）。又有人話係狀語後置。
普通話雖然口語上唔講（甚至少講掛）「匙羹」，但書面語上依然會寫「羹匙」。如以下截圖：
![]()
入屋
粵語講「入」，普通話唔會講「入」，講「進」。不過「入屋」或「入屋盗竊」呢啲詞呢，書面亦會寫。
但「入」係沿用自古語，用法更攸久，更古雅。如：
『左傳 僖公二十八年』三月丙午，晉侯入曹，執曹伯。畀（bei2）宋人。（注：曹伯，曹國國君，爵位大細順序：公侯伯子男）
『史記』項王伏弩射中漢王。漢王傷，走（快過「行」）入成臯。
『楚辭 離騷』進不入以離尤（紛爭）兮，退將復脩（修）吾初服。（注：進，退之反；入，出之反。）
將
最後，講講個「將」字。廣東話用「將」，普通話用「把」。而「將」用得比「把」要攸久，如果去查下康熙字典，「把」字並無「將」旣意思。究其原因，主要係普通話讀「將乜乜」拗口，所以「將」就成爲咗書面用語，「把」字就口语用得多，而廣東人口語常用「將」。其實一直沿用旣中文，「把」字祇係握持之意，如「把酒言歡」。
「把」字句好可能係來自蒙滿語詞彙。元代之後先至出現「把」「將」等介詞句子。查實傳統旣新會話（或四邑話）係唔用「把乜乜」「將乜乜」旣講法。
譬如，新會話會直接講「信唔信我殺矣（eh3）你」，「畀乃（新會話旣「啲」）錢佢」，「佢打躧（laai4）矣我隻腳」，動詞放前邊， 唔會講「信唔信我將你殺矣」，「將乃錢畀佢」，「佢將我隻腳打跛（bai1）咗」。
再如話「快將啲作業做晒！」新會話就講「快做晒乃作業！」而好明顯，後者有力過前者好多。加咗「將」之後，顯得軟弱無力。
回顧上一回：論粵語常用口語，普語祇作書面語
友情链接